"Azərbaycanla oyunda qələbə qazanmasaq, fəlakət olacaq"

"Bəli uduzduq. Baş məşqçi demişkən, onlar daha istəkli idilər və sonadək mübarizə apardılar. Ürəkdən oynadılar və meydanın hər qarışı uğrunda döyüşdülər. Bir qol imkanı yaratdılar ki, ondan da maksimum istifadə etdilər".

Qol.Az-ın məlumatına görə, bu sözləri "Ria Novosti"yə açıqlamasında Rusiya millisinin hücumçusu Artem Zyuba Şimali İrlandiya ilə oyundan (0:1) sonra deyib.

24 yaşlı futbolçu qarşıdakı 4 oyunda mütləq qələbə qazanmalı olduqlarını bildirib: "Çox ağır məğlubiyyət oldu. Şəxsən mən bu məğlubiyyətə görə xəcalət çəkirəm. Ancaq ehtiyatda 4 oyunumuz qalır və hər şey öz əlimizdədir. Qarşıdakı 4 oyunda qələbə qazansaq, dünya çempionatının final mərhələsinə gedəcəyik. Əgər bunu bacarmasaq, fəlakət olacaq". 

Qeyd edək ki, Rusiya millisi seçmə mərhələnin növbəti 4 oyununda Lüksemburq (ev, səfər), İsrail (ev) və Azərbaycanla (səfər) qarşılaşacaq.