“BƏƏ Səudiyyə Ərəbistanının suverenliyinə və təhlükəsizliyinə tam hörmət edir” - XİN
Birləşmiş Ərəb Əmirlikləri (BƏƏ) Səudiyyə Ərəbistanı Krallığının bəyanatından və Yəməndəki hazırkı hadisələrdə BƏƏ-nin rolu ilə bağlı orada yer alan tamamilə yanlış məlumatlardan narahatlığını bildirir.
525.az xəbər verir ki, bu barədə BƏƏ-nin Xarici İşlər Naziliyinin yaydığı açıqlamada bildirilir.
Qeyd olunub ki, BƏƏ Yəməndə tərəflər arasında gərginliyə ölkəni cəlb etmək cəhdlərini qəti şəkildə rədd edir və Səudiyyə Ərəbistanı Krallığının təhlükəsizliyini sarsıdacaq, yaxud sərhədlərini hədəfə alacaq hərbi əməliyyatlar aparmaq üçün Yəməndə heç bir qruplaşmaya hər hansı göstəriş verməyib.
“BƏƏ Səudiyyə Ərəbistanının təhlükəsizliyi və sabitliyinə sarsılmaz sadiqliyini, suverenliyinə və milli təhlükəsizliyinə tam hörmətini ifadə edir, Krallığın və ya daha geniş bölgənin təhlükəsizliyini təhdid edə biləcək hər hansı bir hərəkəti rədd edir. BƏƏ iki ölkə arasındakı qardaşlıq və tarixi münasibətlərin regional sabitliyin təməl daşı olduğuna qəti şəkildə inanır və Krallıqla tam koordinasiyasını bir daha təsdiqləyir”, - bəyanatda vurğulanıb.
O da bildirilib ki, BƏƏ-nin Hadramaut və Əl-Mahra əyalətlərində baş verən hadisələrin əvvəlindən bəri mövqeyi vəziyyəti cilovlamağa, gərginliyin azaldılması səylərini dəstəkləməyə və qardaş Səudiyyə Ərəbistanı Krallığı ilə tam koordinasiyada təhlükəsizliyin və sabitliyin saxlanılmasına, eləcə də mülki şəxslərin qorunmasına töhfə vermək üçün anlaşmaların təşviq edilməsinə yönəlib. Nazirlik onu da vurğulayıb ki, sözügedən yükdə heç bir silah olmayıb və boşaldılmış nəqliyyat vasitələri Yəmən tərəfi üçün nəzərdə tutulmayıb, Yəməndə fəaliyyət göstərən BƏƏ qüvvələri tərəfindən istifadə üçün göndərilib. Bu barədə yayılan iddialar yükün mahiyyətini və ya məqsədini əks etdirmir. Eyni zamanda, XİN BƏƏ ilə Səudiyyə Ərəbistanı arasında bu nəqliyyat vasitələri ilə bağlı yüksək səviyyəli koordinasiyanın, eləcə də nəqliyyat vasitələrinin limandan çıxmayacağı barədə razılaşmanın olduğunu vurğulayıb. Buna baxmayaraq, BƏƏ Mukalla limanında nəqliyyat vasitələrinin hədəfə alınmasından təəccüblənib. XİN bəyan edib ki, BƏƏ-nin Yəməndəki mövcudluğu qanuni Yəmən hökumətinin tələbi ilə və Səudiyyə Ərəbistanının rəhbərlik etdiyi Ərəb Koalisiyası çərçivəsində, Yəmən Respublikasının suverenliyinə tam hörmətlə yanaşı, legitimliyin bərpasına dəstək vermək və terrorizmlə mübarizə aparmaq məqsədi daşıyır. BƏƏ Koalisiya əməliyyatlarının başlamasından bəri əhəmiyyətli qurbanlar verib və müxtəlif mərhələlərdə qardaş Yəmən xalqı ilə həmrəylik nümayiş etdirib.
O da qeyd olunub ki, son hadisələrə məsuliyyətlə, eskalasiyanın qarşısını almaqla, təsdiqlənmiş faktlara və müvafiq tərəflər arasında mövcud koordinasiyaya əsaslanaraq yanaşmaq lazımdır.
Pərvanə Sultanova
