İranda etirazlarda ölənlərin sayı 5848-ə çatıb - HRANA

ABŞ-də yerləşən İran İnsan Haqları Fəalları Xəbər Agentliyi (HRANA) ölkədə iqtisadi problemlər səbəbindən başlayan etirazlarda ölənlərin sayının 5848-ə çatdığını açıqlayıb.

525.az xarici KİV-ə istinadən xəbər verir ki, HRANA-nın məlumatında İranın bir çox yerində baş verən hadisələr nəticəsində 41283 nəfər saxlanıldığı qeyd olunub. Bildirilib ki, qarşıdurmalarda 209 təhlükəsizlik işçisi də daxil olmaqla 5848 nəfər həyatını itirib.

Xatırladaq ki, 28 dekabr 2025-ci ildə Tehranın Böyük Bazarında dükan sahiblərinin rəhbərliyi ilə başlayan etirazlar, yerli valyutanın xarici valyutalara qarşı sürətlə dəyərdən düşməsi və iqtisadi çətinliklərin dərinləşməsi səbəbindən ölkə daxilində yayıldı.

8 yanvarda paytaxt Tehranda baş verən etirazlar zamanı şiddətlənən qarşıdurmalardan sonra hökumət internetə çıxışı bağladı.

İran Şəhidləri və Veteranları Fondunun Məhkəmə Tibbi İnstitutu iki gün əvvəl etirazlar zamanı baş verən toqquşmalarda təhlükəsizlik qüvvələri və mülki şəxslər də daxil olmaqla 3117 nəfərin həyatını itirdiyini açıqlayıb.

İranda etirazlar başa çatsa da, Virciniyada yerləşən HRANA daha çox hadisənin təsdiqləndiyini iddia edərək ölüm və saxlanılma rəqəmlərini yeniləməyə davam edir.

İbrahim Cəfərov