“Çin Azərbaycanın üçüncü ən böyük ticarət tərəfdaşıdır” - Lu Mey

“İkitərəfli münasibətlərin səviyyəsi artdıqca, iki ölkə arasında iqtisadi və ticarət əməkdaşlığı güclü inkişaf nümayiş etdirir. Ötən il Çin və Azərbaycan arasında ikitərəfli ticarət dövriyyəsi əvvəlki illə müqayisədə 30,2% artaraq 4,87 milyard dollara çatıb və ardıcıl üçüncü il üçün rekord həddə çatıb”.

525.az xəbər verir ki, bunu Çin Xalq Respublikasının (ÇXR)  Azərbaycandakı səfiri xanım Lu Mey brifinqdə deyib.

Səfir bildirib ki, bu ilin yanvar ayında Çin və Azərbaycan arasında ticarət dövriyyəsi 420 milyon ABŞ dollarına çatıb və Çin Azərbaycanın ilk dəfə olaraq üçüncü ən böyük ticarət tərəfdaşı olub.

“İki ölkə arasında ticarət dövriyyəsi nəinki sürətlə artıb, həm də praktiki əməkdaşlığın keyfiyyəti və səviyyəsi də xeyli yüksəlib. Çin şirkətləri Azərbaycanda bərpa olunan enerjinin istehsalı, avtomobil istehsalı, informasiya-kommunikasiya texnologiyaları, tikinti materiallarının istehsalı kimi sahələrdə fəal şəkildə layihələr həyata keçirirlər.

İrəliyə baxsaq, Çin və Azərbaycan arasında praqmatik əməkdaşlıq daha da təkmilləşmə və modernləşmə üçün böyük potensial və geniş imkanlar təklif edir. Çin yüksək texnologiyalı istehsal, süni intellekt, informasiya sənayesi və infrastruktur sahələrində əldə etdiyi qabaqcıl qlobal nailiyyətləri Azərbaycanla bölüşməyə hazırdır və daha yüksək keyfiyyətli Azərbaycan məhsullarının Çin bazarına daxil olmasını alqışlayır”.

Pərvanə Sultanova