Türkiyənin Antalya şəhərində “Dialoq Avrasiya” (DA) Platformasının düzənlədiyi “Dünya İqtisadi düzəni yeni düşüncədə” mövzusunda Konfrans keçirilib. Noyabrın 30-da başlayan və 2 gün davam edən Konfransa dünyanın 21 ölkəsindən ziyalılar və iqtisadçı alimlər, həmçinin Azərbaycandan Xalq yazıçısı Anar, millət vəkili Nizami Cəfərov, Teleradio Şurasının sədri Nuşirəvan Məhərrəmli, professor Qulu Məhərrəmli, “525-ci qəzet”in baş redaktoru Rəşad Məcid, Bakı Dövlət Universitetinin professoru Şahlar Əsgərov, Azərbaycan Turizm İnstitutunun direktoru Cəfər Cəfərov və başqaları iştirak ediblər.

Konfransın açılış mərasiminə “Dialoq Avrasiya”nın Azərbaycan üzrə nümayəndəsi Mustafa Saatçı aparıcılıq edib. Mustafa Saatçı öz çıxışında iştirakçıları salamlayaraq aşağıdakıları vurğulayıb: “İnsanlar arasında olduğu kimi, toplumlar, cəmiyyətlər, mədəniyyətlər arasında da dialoq, bir-birini anlama, tanıma çox vacib məqamlardandır. Fərqlilikləri, ortaqlıqları, gələcəklə bağlı təsəvvürləri görmək, insani dəyərlərin daha yüksək şəkildə var olduğu yeni bir dünya qurmaq üçün dialoq ən önəmli vasitələrdən biridir. 1998-ci ildən fəaliyyət göstərən “Dialoq Avrasiya” Platformasında demokratiya, insan haqları, bazar iqtisadiyyatı və qarşılıqlı dialoq kimi anlayışlar təməl prinsipləri kimi qəbul edilib. DA əsasən cəmiyyətlərin bir-birini intellektual və mədəni fəaliyyətlərlə daha yaxından tanımasına önəm verib. Bu baxımdan Ukrayna Milli Komitə başkanımız Serqey Teleş bu toplantıları Sosial Davos olaraq dəyərləndirib. Bəli, biz bu toplantılarımızı əsasən sosial, mədəni məsələlərin müzakirə olunduğu Antalya Forumu kimi gerçəkləşdiririk. Biz iqtisadi və əxlaqi dəyərlərin eyni çərçivədə yer almasının ölkələrimizə gətirəcəyi üstünlüklərə önəm veririk”.

Sonra söz alan “Dialoq Avrasiya”nın dönəm başqanı, Kiyev Taras Şevçenko Universitetinin professoru Vladimir Serqeyçuk Antalya Forumuna uğurlar diləyərək iştirakçılar üçün faydalı keçəcəyinə ümid etdiyini bildirib. Daha sonra Rusiya Federasiyası Sankt-Peterburq Ticarət müdiri Vladimir Katanev, Bank Asiyanın baş direktoru Abdulla Çelik, Cümhuriyyət Xalq Partiyası İqtisadi siyasət üzrə sədr müavini, millət vəkili Faik Öztrak və başqaları çıxış ediblər.

Mustafa Saatçı dünya iqtisadi krizisinə rəğmən Türkiyə iqtisadiyyatının inkişaf etməsində böyük rolu olan iqtisadiyyat üzrə baş nazirin müavini Əli Babacana söz verib. Baş nazirin müavini son illərdə Türkiyə iqtisadiyyatının möhkəmlənməsi və inkişafı istiqamətində görülən işlərdən danışaraq dünya iqtisadiyyatından yayınmağın yolunun heç də qapıları bağlamaq olmadığını söyləyib: “Türkiyə dünya iqtisadi böhranı dövründə öz qonşuları ilə əməkdaşlıq etməkdən çəkinmədi, iqtisadi böhrandan çıxmağın yolunu açıq bazar iqtisadiyyatında gördü”. Baş nazirin müavini tədbirə uğurlar arzulayıb və forumda müzakirə olunan məsələlərin müasir dünya üçün gərəkli bəhrələr verəcəyinə inandığını söyləyib.

Daha sonra Əli Babacan “Dialoq Avrasiya”nın qurulmasında, inkişafında xidmətlərinə görə Roza Aytmatova, Xalq yazıçısı Anar, Rusiya Elmlər Akademiyasının üzvü Rostislav Rıbakov, Beynəlxalq Qaradəniz Universitetinin prorektor Guliya Alasaniya, Qazaxıstan Yazarlar Birliyinin sədri Nurlan Orazalin, Boris Marian, DA-nın dönəm başqanı Vladimir Sergeyçuk, DA-nın eks baş katibi Erkam Tufan Aytava fəxri mükafatlar təqdim edib.

Konfrans çərçivəsində “Dünya iqtisadiyyatı problemləri”, “Dünya iqtisadiyyatına yeni yanaşma”, “Qlobal institutların yenidən qurulması”, “İqtisadiyyat və əxlaqi dəyərlər” mövzularında iclaslar keçirilərək Moldova, İngiltərə, ABŞ, Çin, Türkiyə, Rusiya, Hindistan, Ukrayna, Almaniya və başqa dövlətlərdən olan iqtisadçıların məruzələri dinlənilib. Azərbaycandan Bakı Dövlət Universitetinin professoru Şahlar Əsgərovun “Az inkişaf etmiş ölkələrdə inkişaf və qlobal dünyada gəlirin qeyri-bərabər paylanması” mövzusunda etdiyi çıxış və prezentasiya xüsusi maraqla qarşılanıb.

Konfransın bağlanışını “Dialoq Avrasiya” forumunun icraçı katibi İsmayıl Tas aparıb. Bağlanış mərasimində Qazaxıstan millət vəkili Adil Ahmetov, Türkiyə millət vəkili Mehmet Sağlam, “Dialoq Avrasiya”nın Azərbaycan üzrə milli komitəsinin rəhbəri, millət vəkili Nizami Cəfərov və başqaları çıxış edərək görülən işlərdən və gələcək planlardan danışıblar. Daha sonra Vladimir Sergeyçuk 2010-2012-ci illərdə görülən işlər barədə hesabat məruzəsi ilə çıxış edib. Hesabat məruzəsi iştirakçılar tərəfindən yüksək qiymətləndirilib. Sonra Vladimir Sergeyçuk məqalə müsabiqəsinə fəxri diplomlar təqdim edib.

Tədbirin sonuncu bölümündə 2012-2014-cü illər üçün “Dialoq Avrasiya” Forumuna yeni sədr seçilməsi prosesi keçirilib. Qazaxıstan və Qırğızıstan nümayəndə heyəti DA-nın Belarus milli komitəsinin rəhbəri, Belarus Dövlət Sənət Akademiyasının prorektoru, professor Svetlana Vinokurovanın namizədliyini irəli sürüblər. Namizədlik səsə qoyulub yekdilliklə qəbul olunub. Eks həmsədr Vladimir Sergeyçuk, həmçinin Türkmənistan və Qazaxıstan nümayəndə heyətləri yeni həmsədrə hədiyyələr təqdim ediblər. Türkiyəli həmsədr Harun Tokakın sağlamlığı ilə bağlı öz vəzifəsindən getmək istəyi müzakirə olunub. “Dialoq Avrasiya”nın ilk başqanlarından olan Xalq yazıçısı Anar DA-nın Azərbaycan nümayəndəsi Mustafa Saatçının qənaətbəxş fəaliyyətindən, gördüyü işlərdən danışaraq həmsədr olması təklifilə çıxış edib. Müzakirələrdən sonra Platforma Harun Tokakın həmsədr kimi fəaliyyətinin davam etdirilməsini məqsədəuyğun sayıb. Sonda forum öz işini yekunlaşdırıb.

NƏZRİN

Bölmənin digər xəbərləri