“Fənərbaxça” yenidən Çempionlar Liqasında
UEFA-nın iki il müddətinə avrokuboklardan uzaqlaşdırdığı Türkiyənin "Fənərbaxça" klubu yeni mövsümdə Çempionlar Liqasında iştirak edəcək.
Qol.Az-ın Türkiyə mətbuatına istinadən yaydığı məlumata görə, bu barədə klubun prezidenti Əziz Yıldırım bildirib. Əziz Yıldırım İstanbul klubunun iyulun 19-u keçiriləcək ÇL-in püşkatma mərasimində iştirak edəcəyini söyləyib.
“Bu gün çox önəmli hadisələr oldu. Danışılmış oyunlarda adımızın hallanmasına hər birimiz təəssüfləndik. Layiq olmadığımız cəza aldıq. Lakinn qərarın ləğvinə nail ola bildik” – deyə o qeyd edib.
Ə.Yıldırım bu çətin dönəmdə "Fənərbaxça"nı dəstəkləyən hər kəsə təşəkkür edib: “Klub azarkeşləri bunu bilsin ki, komanda yeni mövsümün Çl-ində iştirak edəcək".
Qeyd edək ki, hələlik UEFA “Fənərbaxça” barəsində çıxardığı qərarı ləğv etməklə bağlı açıqlama verməyib.
Amma Türkiyə mətbuatı yazıb ki, Arbitraj Məhkəməsi “Fənər”lə bağlı qərarın icrasını dayandırıb.
