Ruslan Abışov: "Uiqan"la oyuna qədər hazır olacağam"
"Artıq bütün yaralarım sağalıb və özümü yaxşı hiss edirəm. Qarşıdakı günlərdə müəyyən məhdudiyyətlərlə məşqlərə başlayacam".
Qol.Az-ın məlumatına görə, bu sözləri millimizin üzvü və "Rubin" klubunun futbolçusu Ruslan Abışov deyib.
Zədəsini sağaltdığını bildirən Ruslan Avropa Liqasının qrup mərhələsində "Uiqan"la oyuna qədər hazır olacağını bildirib:
"Cümə günü komanda ilə məşqlərə başlaya biləcəm. Bu gün isə yüngül qaçışla kifayətləndim. Təəssüf ki, Premyer Liqada "Rostov"la görüşdə iştirak edə bilməyəcəm. Ancaq Avropa Liqasında "Uiqan"la evdə keçirəcəyimiz oyuna qədər hazır olacam. Hər kəsə məlumdur ki, "Rubin" hazırda turnir cədvəlində layiq olduğu pillədə deyil. Buna görə də hər oyunda qələbə qazanmağa və turnir cədvəlində mövqeyimizi düzəltməyə çalışacağıq".
