"Qəbələ" məşqçisi ilə yolları ayırdı
"Qəbələ" Futbol Akademiyasının məşqçisi Recep Yazıcı ilə yollarını ayırıb.
Qol.Az-ın xəbərinə görə, bu barədə klubun rəsmi saytı məlumat yayıb.
2009-cu ilin avqust ayından "Qəbələ"də çalışan türkiyəli mütəxəssislə başa çatan müqaviləsin müddəti qarşılıqlı razılıqla uzadılmayıb.
4 ildən çox müddətdə akademiyada çalışan Recep Yazıcı klubun saytına açıqlamasında bunları deyib:
"5 ilə yaxındır çalışdığım klubdan böyük qürurla ayrılıram. Qəbələdə çalışmaq - akademiyanın inkişafında rol oynamaq, Azərbaycan gəncliyinə xidmət etmək karyeramda dərin izlər buraxdı. Amma mən buradan ruhən ayrılmamışam, daim ürəyim yetirmələrimizin yanında olacaq. "Qəbələ" Futbol Akademiyasının bundan sonra da yalnız irəliyə doğru gedəcəyinə və Avropanın seçilən akademiyalarından birinə çevriləcəyinə heç şübhəm yoxdur. Sonda birlikdə çalışdığım bütün heyət üzvlərinə, sevimli futbolçularıma uğurlar arzulayır, onlara öz təşəkkürümü bildirirəm".
