Məşhur güləşçi rəsmən Azərbaycan yığmasında!

Qadın güləşi üzrə bolqarıstanlı 2 qat olimpiya mükafatçısı Stanka Zlateva Azərbaycanın sərbəst güləş üzrə yığma komandası ilə birgə məşq edəcək.

Lent.az-ın məlumatına görə, 31 yaşlı pəhləvan hazırda millimizdə baş məşqçi postunu tutan şəxsi məşqçisi Simeon Şerevin rəhbərliyi altında hazırlıq keçəcək.
 
Bu barədə Bolqarıstanın gənclər və idman naziri Mariana Georgiyeva yerli mətbuata açıqlama verib. O bildirib ki, Zlatevanın Azərbaycanda hazırlığı ilə bağlı bütün xərcləri rəhbərlik etdiyi nazirlik öz üzərinə götürüb: “Stanka yenə Bolqarıstan millisinin şərəfini qoruyacaq. Amma o, şəxsi məşqçisi Şerevin rəhbərliyi altında məşq etmək istəyir. Biz də razılıq verdik və lazımi məbləği Bolqarıstan Güləş Federasiyasının hesabına köçürəcəyik”.
 
Qeyd edək ki, 72 kq çəki dərəcəsində yer alan Stanka Zlateva 2008-ci il Pekin və 2012-ci il London Yay Olimpiya Oyunlarının gümüş mükafatçısı olub. O, həm də 5 qat dünya və 5 qat Avropa çempionudur. Daha öncə Zlatevanın 1 milyon avro qarşılığında Azərbaycan millisinə keçəcəyi bildirilirdi.