“Bu bəyanat və ya hesabat çox qeyri-obyektivdir, Azərbaycandakı reallığı əks etdirmir. Burada bütün məsələlərə yanaşmada ifrat qərəzlilik müşahidə olunur”.
Bunu “525”-ə açıqlamasında Prezident Administrasiyası (PA) rəhbərinin müavini və Xarici əlaqələr şöbəsinin müdiri Novruz Məmmədov ABŞ Dövlət Departamentinin son hesabatına münasibətini bildirərkən dilə gətirib.
“Bu hesabatı biz əlbəttə, qəbul etmirik. Çox təəssüf ki, ABŞ Azərbaycana qarşı qərəzli mövqeyini həmişə olduğu kimi, fürsət düşəndə nümayiş etdirib. Biz bunu tez-tez müşahidə edirik”-deyən PA rəsmisinin sözlərinə görə, insan hüquqları, fikir və ifadə azadlığı, sərbəst toplaşma azadlığı və digər məsələlərlə bağlı göstərilən mövqe Azərbaycandakı reallıqdan tam fərqlidir.
“Təəssüf ki, biz belə qərəzli mövqeni tez-tez müşahidə edirik. Əgər belə olmasaydı, elə bu günlərdə 22 il əvvəl bir gecədə qətlə yetirilmiş 613 nəfər günahsız uşaq, qadın və qocanın hüquqları barədə verilən suala ABŞ Dövlət Departamentinin sözçüsü cənab Psaki heç olmasa deməyə bir söz tapardı.
Jurnalisti sualını təkrar edərək, “niyə mövqe bildirmirsiniz, deyə” irad tutmağa məcbur etməzdi. Və yaxud, 20 ildən artıq bir müddətdə ərazilərimizi işğal altında saxlayan tərəfə “işğalçı desək, bu, təhqir hesab edilə bilər” bəyanatını necə başa düşmək lazımdır? Budur ABŞ-ın ədalətli mövqeyi?”-deyə, N. Məmmədov bildirib.
PA rəhbərinin müavini deyib ki, amma göründüyü kimi, budəfəki hesabatda onu tərtib edən “dostlar” Azərbaycandakı real prosesləri yox, özlərinin qərəzli mövqelərini nümayiş etdirmək üçün dəridən-qabıqdan çıxıblar.
“Bilirsiniz, bu gün dünyanın 50-dən çox ölkəsi müxtəlif səbəblər üzündən gərginlik yaşır, 10-a yaxın ölkədə müxtəlif xarakterli münaqişə və müharibə gedir. Bu proseslər isə heç də özbaşına olmur. Azərbaycan belə bir beynəlxalq şəraitdə 20 ildir ki, sabitlik və dinamik inkişaf adasına çevrilib.
Bunu hamı əla görür və qiymətləndirir. Bunu elə 2013-cü ilin oktyabrında keçirilən prezident seçkiləri də nümayiş etdirdi. Əminəm ki, Azərbaycan xalqın öz tarixi nailiyyətini - 20 il ərzində nail olduğu bu sabitliyi və dinamik inkişafıl bundan sonra da qoruyub saxlayacaq”-deyə, N.Məmmədov sonda sözlərinə əlavə edib.
Kamil Həmzəoğlu