Gözlərimə nur dolur - Əziz Kərim yazır

Əziz KƏRİM

Sevmirsən

Demirəm uzaqlaş, çəkil yolumdan,

Mən sənə sevməyi öyrədəcəyəm.

Məhəbbət güclüdür gələn ölümdən,

Mən sənə sevməyi öyrədəcəyəm.

Ardımca baxarsan - qanın qaynayar,

Bu donmuş hisslərin qəfil oynayar.

Qəlbin təlaşlanar, ruhun boylanar,

Mən sənə sevməyi öyrədəcəyəm.

Sən də çəkəcəksən sevgi yükünü,

Gecikmə, Simurğun yandır tükünü.

Nura qərq edəcəm könül mülkünü,

Mən sənə sevməyi öyrədəcəyəm.

Qəfildən sevməyin çox asan olar,

Sevgidən doğulan pak insan olar.

Dünyamız sevgidən gülüstan olar,

Mən sənə sevməyi öyrədəcəyəm.

Olanda

Gözlərimə nur dolur

Sən yanımda olanda.

Bu dünya mənim olur

Sən yanımda olanda.

Qəm bürüməz çöhrəni,

Külək əyməz pöhrəni.

Kədər, qüssə köhnəlir

Sən  yanımda olanda.

Gül ömürlü yaz adam,

Bunu duyar az adam.

Hər qayğıdan azadam

Sən yanımda olanda.

Aydın olsun

Aydın olsun səhərin,

Aşıb-daşsın bəhərin.

Mübarəkdir qələbən,

Mübarəkdir Zəfərin.

Həqiqətə, paklığa

Heç bir ləkə düşməsin.

Budaq üstə meyvələr

Saralıb büzüşməsin.

Ədalətə səs verək,

Qələbəni tez çalaq.

Həqiqətin yanında

Bayraq kimi ucalaq.

Üzlərdə sevinc, şadlıq,

Hamı azad yaşasın.

Silah yüklü qatarlar

Daha beşik daşısın!