|
|
|
|
İmam Cəmillinin kitabları təqdim olundu
Gəncə şəhər İcra Hakimiyyətinin dəstəyi, Gəncə Regional Mədəniyyət İdarəsinin təşəbbüsü və AYB Gəncə bölməsinin təşkilatçılığı ilə GMKS-nın oxu zalında tanınmış şair İmam Cəmillinin kitablarının təqdimatı keçirilib.
525.az xəbər verir ki, təqdimatı GMKS-nin Xidmət Şöbəsinin müdiri Aidə Abdullayeva açaraq, torpaqlarımız uğrunda şəhid olanların xatirəsini bir dəqiqəlik sükutla yad edilməsini təklif edib. O, sözü AYB Gəncə Bölməsinin sədri, əməkdar mədəniyyət işçisi, şair-dramaturq Xəzangül xanıma verib.
X.Hüseynova İmam Cəmillinin yaradıcılığı haqqında müfəssəl danışıb. Xanım yazar qeyd edib ki, AYB və AJB-nın üzvü, “Qızıl qələm” mükafatçısı, “Dövlət naminə” qəzetinin baş redaktoru, Prezident təqaüdçüsü (2018-ci il), şair, yazıçı, publisist İmam Cəmilli məhsuldar yaradıcılığı ilə oxucuların diqqətini cəlb edib, onların rəğbətini çoxdan qazanıb. İ.Cəmillinin ard-arda çıxan, bu gün təqdimatına yığışdığımız “Təzadlı dünyanın təzadlı adamı”, “Seçilmiş əsərlər II cild”, “Azadlığın sərhəddi yoxdu” kitabları da eyni həvəslə oxunur və təqdir olunur.
Əməkdar jurnalist, görkəmli yazıçı Qərib Mehdi çıxışında bildirib ki, İmam Cəmilli öz əsərlərində həyat reallıqlarını bədii təsvir vasitələri ilə qələmə almağı ustalıqla bacarır. Onun əsərləri oxunaqlı və düşündürücüdür.
Şair və yazıçılardan İlham Musaoğlu, İnqilab İsaq, Zahir Şirani, Cavanşir Qocayev, İqbal İsmayılov, Fazil Sənan, Salman Balakişiyev, Eldar İsayev, Musviq Məhərrəmov, İlqar Müzəffəroğlu, Zülfiyyə Yaqub, Minayə Abdullayeva və Aləmzər Əlizadə İmam Cəmillinin yaradıcılığı haqqında ürək sözlərini söyləyiblər, şeirlərindən nümunələr səsləndiriblər.
Tədbirdə oxucu qismində iştirak edən ziyalı Salman İmanlı yazıçı-publisist İmam Cəmillini təbrik edib ona yeni uğurlar arzulayıb.
Sonda İ.Cəmilli AYB Gəncə Bölməsinə, kitablarının təqdimatına toplaşanlara təşəkkürünü bildirib və yeni şeirlərini oxuyub.
Məclisdə iştirak edənlər İmam Cəmillinin kitablarından ibarət sərgiyə baxıblar, xatirə şəkli çəkdiriblər.
