Azərbaycan bayrağı

Şəmsi VƏFADAR

Azərbaycan bayrağı

Göylərin yaraşığı,

Səmaların nur payı

Azərbaycan bayrağı...

Sən minlərlə şəhidin

qanından yoğrulmusan,

Bütün ellər bilir ki,

sən haqdan doğrulmusan.

Sən azadlıq rəmzisən,

Müstəqil dövlətimin,

elimin fəxarəti...

sənə səcdə edirik.

Qüruru,

and yerisən

yenilməz millətimin...

Sən dalğadan Şuşada,

dalğalan Xankəndidə...

Sən dalğalan yurdumun

hər yerində, bəndində

Sənin yerin Borçalı,

sənin yerin Dərbənddi,

Sənin yerin Təbrizdi,

sənin yerin Mərənddi.

Elim-obam, millətim,

Ali Baş Komandanım...

Bircə sözün bəsdi

Kükrəsin ümman kimi,

Kükrəsin dəniz kimi,

yağı düşmən yalvarsın,

diz çöksün hüzurunda...

Sən bu elin-obanın,

Sən bu yurdun-yuvanın,

Sən bu xalqın, millətin...

tükənməz sərvətisən,

Sənə toxunan meh də...

Üstünə qonan şeh də...

Dünyaya xoşbəxt gəlib.

Səcdəgahsan sən bizə,

Qibləgahsan sən bizə...

Azərbaycan bayrağı...

Sən dalğalan göylərdə,

Düşmənə göz dağısan...

Gözümüzün qarası,

Gözümüzün ağısan...