Ulduz futbolçu irqçiliyə görə klubu tərk etdi
Fransalı futbolçu Allan Sent-Maksimen Meksikanın "Amerika" klubu ilə yollarını ayırıb.
525.az xəbər verir ki, "Nyukasl"ın sabiq oyunçusu bu qərarı ailəsinin irqçi hücumlara məruz qalması səbəbindən verib. Futbolçu sosial şəbəkə hesabında hadisə ilə bağlı çox sərt bəyanat yayıb:
"Problem dərinin rəngində deyil, düşüncələrin rəngindədir. Mənə qarşı hücumlar problem deyil, mən böyümüşəm və cavab verməyi öyrənmişəm. Lakin bir şeyi əsla qəbul etmərəm, o da uşaqlarıma qarşı aqressiyadır".
Futbolçu uşaqlarını hədəf alanlara xəbərdarlıq edib:
"Uşaqlarımı qorumaq mənim əsas vəzifəmdir. Onlara toxunmağa cürət edənlərə səslənirəm: siz böyük səhv etdiniz. Məni qorxuda biləcək heç bir insan və ya təhdid yoxdur. Bu dünyada qorxduğum yeganə varlıq Allahdır".
Qeyd edək ki, vinger "Amerika"ya 2025-ci ilin yayında qoşulmuşdu. O, Meksika klubunun heyətində keçirdiyi 15 oyunda 3 qol və 2 məhsuldar ötürmə ilə yadda qalıb.
