2028-ci il Yay Olimpiya Oyunlarının futbol yarışları bu şəhərlərdə keçiriləcək
2028-ci ildə ABŞ-də keçiriləcək Yay Olimpiya Oyunlarının futbol yarışlarına ev sahibliyi edəcək şəhərlər açıqlanıb.
525.az xəbər verir ki, bu barədə olimpiadanın rəsmi saytı məlumat yayıb.
Bildirilib ki, futbol matçları yalnız Kaliforniya ştatı ilə məhdudlaşmayacaq və ölkə üzrə 6 şəhəri əhatə edəcək.
Los-Anceles-2028-in icraçı direktoru Reynold Huver Beynəlxalq Olimpiya Komitəsinin (BOK) üzvlərinə açıqlamasında qrup mərhələsinin oyunları üçün ABŞ-ın Əsas Futbol Liqasına (MLS) məxsus mövcud ən yaxşı stadionlardan istifadə olunacağını bildirib.
Futbol oyunlarını qəbul edəcək şəhərlər bunlardır: Nyu-York (şərq sahili), Kolumbus (Ohayo ştatı), Neşvill (Tennessi ştatı), Sent-Luis (Missuri ştatı), San-Dieqo (Kaliforniya ştatı) və San-Xose (Kaliforniya ştatı). Pley-off mərhələsinin və medal uğrunda oyunların isə daha əvvəl razılaşdırıldığı kimi, Los-Anceles yaxınlığındakı Pasadenada yerləşən əfsanəvi “Rouz Bouul” stadionunda keçirilməsi nəzərdə tutulub.
Qeyd edək ki, 2028-ci il Yay Olimpiya Oyunları qadın futbolu baxımından da tarixi olacaq. İlk dəfə olaraq qadınlar arasında keçiriləcək futbol turniri miqyasına görə kişilərin yarışını üstələyəcək. Belə ki, qadınların turnirində 16, kişilərin yarışında isə 12 milli komanda iştirak edəcək.
Xatırladaq ki, Paris-2024 Olimpiadasında bu göstərici əksinə idi — kişilər 16, qadınlar isə 12 komanda ilə təmsil olunmuşdu.
