"Qarabağ"dan getmək istəyirəm"
"Qarabağ"ın yarımmüdafiəçisi Muarem Muarem komandasından ayrılmaq istəyir.
Bu barədə Qol.Az saytına makedoniyalı futbolçu özü məlumat verib.
O, Ağdam klubundan getmək istəməyinin səbəbini oyunlara çıxmaması ilə əlaqələndirib: "Artıq ehtiyatda qalmaqdan sıxılıram. Bir küncdə oturub qalmaq mənə xoş deyil. Təcrübə toplamaq, artırmaq üçün Avropa klublarından birinə getmək fikrindəyəm".
Türk əsilli oyunçu artıq ona Portuqaliyanın məşhur klubundan təklif gəldiyini də bildirib. Bu, Avropada kifayət qədər tanınan "Braqa" klubudur.
"Bu barədə hələ klubumla danışmamışam. "Qarabağ"la bir illik müqaviləm var. Komandam mənə qalmağımı təklif etsə, sadəcə azarkeşlərə görə qalaram" - deyə o bildirib.
Qeyd edək ki, 25 yaşlı futbolçu 2012-ci ildə Makedoniyanın "Rabotniçki" klubundan transfer olunub.
