- Dənizkənarı bulvar iki istiqamətdən - həm Dəniz vağzalından "Ağ şəhər" adlanan yeni bulvara qədər, həm də Dövlət Bayrağı Meydanından Bibiheybət məscidi istiqamətində inşa olunmaqdadır. 2008-ci ildə bulvarın uzunluğu 4 kilometrə yaxın idisə, bu gün bulvar 6 kilometr uzunluqdadır. Hazırda bulvar üçün inşa olunan ərazilər hələ ki, rəsmən Bulvar İdarəsinə verilmədiyi üçün orada nələrin olduğu, nələrin olacağı barədə danışmağım bir qədər çətindir. Orada işlər gedir. Ayrı-ayrı dövlət qurumları orada əmlakın çıxarılması, söküntülərin aparılması və sahil boyu bənd atma işləri ilə məşğuldur.

Amma məlumatım var ki, bulvarın istifadəyə verilmiş yeni hissələrində olduğu kimi genişlənən yeni ərazilərində də üstünlük əsasən yaşıllıq sahələrinə veriləcək. Fransız dilindən tərcümədə bulvar sözünün mənası yaşıl sahə, yaşıl məkan, yaşıl zona deməkdir. Bulvara ona görə bulvar demək olar ki, onun yaşıl sahəsi çoxdur.

Bulvarın yeni ərazisində insanların rahat istirahət etmələri, əylənmələri üçün oturacaqlar, işıqlandırma sistemi, yeraltı sanitar qovşaqlar, eləcə də Bulvar İdarəsinin əməkdaşları üçün yeraltı otaqlar tikilir. İşlərin böyük hissəsi 2015-ci ilin yayına qədər sona çatmalıdır. Çünki 2015-ci ildə Azərbaycanda Avropa Yay Olimpiya Oyunları keçiriləcək. Xarici qonaqların, turistlərin, idmançıların yerləşdiyi əsas yer paytaxtın Neftçilər prospekti boyu beşulduzlu mehmanxanalar və daima hərəkət etdikləri yer, təbii ki, bulvar ərazisi olacaq.

Bulvarın artırılan ərazilərində yeni texnologiyalarla hazırlanmış attraksionların, karusellərin olması mütləqdir. İdarəmizin əməkdaşları inkişaf etmiş Avropa ölkələrində olurlar. O ölkələrdə qeyri-adi, maraqlı nə görürlərsə, biz onu Bakı bulvarının ərazisində tətbiq etməyə çalışırıq. Bəzən sahibkarların yaxşı təklifi olanda ona da diqqət yetiririk.

- Bakı bulvarında bahalıqdan narazılıqlar var...

- Qiymətlər haqqında söhbət hər il yay mövsümündə şişirdilir. Bu da təbiidir. Çünki yay mövsümündə əhalinin əksər hissəsi bulvara gəlir. Təbii ki, insan çox olanda alış-veriş də çox olur. Əsasən çaya və digər sərinləşdirici içkilərə böyük tələbat olur. Bu mövzu hər yay mövsümündə qabarır.

Azərbaycanda qiymətləri bazar iqtisadiyyatı tənzimləyir. Xüsusi əmr yoxdur ki, nəyi neçəyə satmaq olar, ya olmaz. Bulvarda təklif olunan yeyinti məhsullarının, attraksion və karusellərin qiymətini Tarif Şurası müəyyən etmir. Buna bazar və sahibkar özü qiymət qoyur. Amma bu o demək deyil ki, sahibkar istədiyi qiyməti qoya bilər. Şübhəsiz ki, qiymətlərə dövlət qurumları, İqtisadi İnkişaf Nazirliyinin Antiinhisar Departamenti nəzarət edir. Ümumiyyətlə götürdükdə isə Dənizkənarı Bulvar İdarəsi öz ərazisində hər şeyə nəzarət edir və müdaxilə etməyə ixtiyarı var. Amma bizim idarə qiymətləri artıran və azaldan qurum olmadığından sahibkara əmr formasında təsir göstərə bilmərik.

- Bulvar İdarəsi nəyə nəzarət edir?

- Hər bir satış obyektində - istər kafe, istər restoran, istərsə də köşk olsun - satılan hər bir məmulatın ədədinə, çəkisinə, litrinə görə qiyməti malın üzərində mütləq olmalıdır. Əgər qiymət yazılmırsa, deməli, sahibkar qanunu pozur. Əgər malın üzərində qiymət qoyulubsa, alıcının heç bir şikayəti ola bilməz. Alıcı ancaq seçim edə bilər ki, həmin məmulatı bu qiymətə almaq ona sərf edər, ya yox. Əgər bulvar ərazisində fəaliyyət göstərən restoran, kafe və çayxanalarda kimsə nəyəsə məcbur edilirsə, məsələn, deyilirsə ki, çayı alırsansa yanında mütləq başqa nəsə də almalısan, bu, qəti qadağandır. Buna qarşı daim mübarizə aparmışıq, bu gün də aparırıq. Vətəndaşlara yeganə tövsiyəmiz odur ki, belə hallarla qarşılaşdıqda Dənizkənarı Bulvar İdarəsinin "Qaynar xətt" xidmətinə (mobil operatorlardan 055 282 70 00, şəhər nömrələrindən (012 480 18 36) müraciət etsinlər. Mobil operatorlardan gələn zənglərə mən özüm cavab verirəm. İdarənin elə bir yeri yoxdur ki, "Qaynar xətt"in nömrələri ora yazılmamış olsun. Qiymətlərə bağlı yol verilən qanunazidd hallara qarşı həmişə mübarizə aparmışıq və aparırıq. İl ərzində bir neçə əməkdaş vətəndaşı aldatdığı üçün işdən azad olunub. Bu cür hallar ildən-ilə azalır.

Elə olur ki, gecə saat 3-də bulvara gəlirəm. Bir də görürsən kiminsə yuxusu qaçıb, gəlib oturub bulvarda və "Qaynar xətt"ə zəng edir. Bildirirəm ki, gözləyin, gəlib yerində araşdırım. Gecə saat 3-də hansı əməkdaşımı yuxudan oyadıb deyim ki, get bulvara?! Amma mən bu məsuliyyəti öz üzərimə götürmüşəm. Çünki dövlət mənə etimad göstərib, bu işi tapşırıb. Mənim də borcumdur ki, şəhər sakinlərinin, qonaqların mədəni istirahətini təmin edim.