Tajani: “İtaliyanın Rusiyanın dərinliklərinə zərbələrlə bağlı mövqeyi dəyişməzdir”

İtaliya mövqeyini dəyişmir və Ukrayna Silahlı Qüvvələrinin Rusiya Federasiyasına dərin zərbələr endirməsinə imkan vermir

İtaliya Ukrayna ilə Rusiya arasındakı münaqişədə Ukraynanın tərəfindədir və Kiyevi dəstəkləməyə davam edəcək. Bununla belə ABŞ-ın ardınca silahlarından Rusiyanın dərinliklərinə zərbələr endirmək üçün istifadəsini təsdiqləməyə hazır deyil.

525.az xəbər verir ki, bu barədə ölkənin xarici işlər naziri Antonio Tajani deyib.

“Bizə gəlincə, tutduğumuz xətti davam etdirəcəyik - silahlarımızın yalnız Ukrayna ərazisində istifadəsi mümkündür. Biz xəttimizi dəyişməyəcəyik və bu istiqamətdə irəliləyəcəyik”, - nazir əlavə edib.

O vurğulayıb ki, Rusiya nümayəndələrinin iştirakı ilə yeni sülh konfransının keçirilməsini dəstəkləyir: “Biz Ukraynanın tərəfindəyik və onu dəstəkləməyə davam edəcəyik. Amma bu o demək deyil ki, sülh üçün də çalışmamalıyıq. Biz həmişə deməliyik ki, İsveçrədə keçirilən kimi sülh konfranslarının tərəfdarıyıq. Lakin bu, rusların, çinlilərin, hindlilərin, braziliyalıların iştirakı ilə baş tutmalıdır”.

Pərvanə Sultanova