“Bayer”in sensasiyalı məğlubiyyətinə Xabi Alonsonun şərhi

“Bayer”in baş məşqçisi Xabi Alonso Almaniya kubokunun yarımfinalında 3-cü liqa təmsilçisi “Arminiya”ya sürpriz şəkildə uduzaraq (1:2) mübarizəni dayandırmalarından danışıb.

QOL.az xəbər verir ki, mütəxəssis komandasının lazımi səviyyədə oynamadığını bildirib:

"Hər kəs məyusluq yaşayır. "Arminiya"nı təbrik edirəm, onlar həqiqətən də öz çıxışları ilə finala layiq idilər. Biz isə məyusuq. Keçən mövsüm tez-tez qol şansı tapırdıq. Amma indi bu şansları qarşı tərəfdə gördük. Oyunumuz lazımi səviyyədə deyildi. Həm komanda şəklində, həm də fərdi baxımdan oyuna nəzarət edə bilmirdik. Bu gün bizim üçün heç nə yolunda getmədi. Yenə də əla fürsət idi”.

Xatırladaq ki, Almaniya kubokunun 2023/24 mövsümünün qalibi "Bayer" olub.

“Arminiya”nın cari mövsüm üçün finaldakı rəqibi isə bu gün müəyyənləşəcək. İkinci yarımfinal görüşündə  "Ştutqart"  "Leyptsiq"lə qarşılaşacaq.