Naxçıvanda 7 yaş qupu üzrə liqalara start verildi - FOTOLAR

AFFA və Naxçıvan Futbol Federasiyasının (NFF) birgə təşkilatçılığı ilə 7 yaş qrupu üzrə Azərbaycan çempionatının Naxçıvan regionu üzrə oyunlarına start verilib.

525.az-a Naxçıvan Futbol Federasiyasının mətbuat xidmətindən verilən məlumata görə, əvvəlcə rəsmi açılış mərasimi keçirilib. Naxçıvan şəhər stadionunda təşkil olunan tədbirdə federasiyanın vitse-prezidenti Elşən Abasov liqalarda iştirak edən futbolçulara uğurlar arzulayıb, bu cür yarışların bölgədə futbolun kütləviliyinin artırılmasına, perspektivli gənclərin üzə çıxarılmasına və gələcəkdə futbolumuza qazandırılması baxımdan fayda verəcəyinə yardım edəcəyini bildirib.

Topa ilk toxunuşu futbol veteranları Arif Xudiyev və İlham Məmmədov ediblər. 

Daha sonra U-16 Liqası çərçivəsində “Şərur Arpaçay” və “Araz-Naxçıvan” komandaları qarşılaşıb. Matç Şərur futbolçularının 2:0 hesablı qələbəsi ilə yekunlaşıb.

Qeyd edək ki, aprelin 20-də yekunlaşacaq U-10, U-11, U-12, U-13, U-14, U-15 və U-16 liqalarında ümumilikdə 42 komanda və 650-yə yaxın futbolçu iştirak edir. Oyunlar 5 stadionda  - Naxçıvan şəhər stadionu, Uzunoba təlim-məşq bazası, Sədərək, Ordubad stadionları və Şərur Olimpiya Kompleksində təşkil olunur. Yekunda U-13, U-14, U-15 və U-16 liqalarının qalibləri Bakıda təşkil olunacaq Azərbaycan birinciliyinin pley-off mərhələsində mübarizəni davam etdirəcək. Matçları müxtar respublikadan olan hakimlər idarə edirlər.

İştirakçı komandaların hamısı NFF tərəfindən oyun formaları, inventarlar və məşq meydançaları ilə təmin olunub, futbolçuların qeydiyyatı aparılıb.