|
|
|
|
Karlo Ançelotti vergidən yayınma ittihamı ilə mühakimə olunub
İtalyan menecer Karlo Ançelotti Real Madriddəki ilk karyerası (2013-2015) ilə əlaqədar İspaniya Xəzinədarlığından vergidən yayınma ittihamı ilə hakim qarşısına çıxıb.
525.az xarici KİV-ə əsasən xəbər verir ki, Madrid Əyalət Məhkəməsində keçirilən iclasda Ançelottini həyat yoldaşı Mariann Barrena və oğlu, eyni zamanda Real Madridin köməkçi məşqçisi Davide Ançelotti müşayiət edib.
Mətbuatın böyük maraq göstərdiyi məhkəmədən əvvəl məhkəməyə daxil olarkən qısa açıqlama verən Karlo Ançelotti, indiyə qədər etdiyi kimi günahsız olduğunu bəyan etmək və sövdələşmə etmək üçün deyil, ifadəsini verməyə gəldiyini qeyd edib.
Ançelotti "Real Madrid"də ilk karyerası zamanı 2014-cü ildə 386.361 avro və 2015-ci ildə 675.718 avro olmaqla, ümumilikdə 1,062 milyon avro məbləğində vergidən yayınmaqda ittiham olunub.
Qeyd edək ki, prokurorluq italyan məşqçiyə 4 il 9 ay həbs cəzası verilməsini, vergi idarəsi tərəfindən həbs yolu ilə vergi borcunun alınmasını və cərimələr daxil olmaqla ümumilikdə 3 milyon 186 min 237 avronun ödənilməsini tələb edir.
Karlo Ançelotti indiyədək ona qarşı irəli sürülən ittihamları rədd edib və günahsız olduğunu bildirib.
Malik Atilay
