Dünən Azərbaycanın Macarıstandakı səfiri Vilayət Quliyev xüsusi mükafata layiq görülüb.
Səfirlikdən verilən məlumata görə, V.Quliyevə Macarıstan prezidentinin müvafiq fərmanına uyğun olaraq “Xidmətlərinə görə” ordeni təqdim edilib.
Macarsıtanın Xarici İşlər və Ticarət Nazirliyində təşkil olunan təltifetmə mərasimində çıxış edən nazirliyin dövlət katibinin müavini Jolt Çutora səfir Vilayət Quliyevin məhz Azərbaycanla Macarıstan arasında siyasi, iqtisadi və humanitar əməkdaşlığın genişləndirilməsi sahəsində xidmətlərinə görə bu ordenlə təltif olunduğunu bildirib. J.Çutora səfir Vilayət Quliyevlə tanışlığının 20 ilə yaxın tarixi olduğunu söyləyərək xatirələrini bölüşüb, Azərbaycanın ictimai-siyasi həyatında, dövlət idarəçiliyi sistemində xüsusi xidmətləri olmuş, elm və ədəbiyyat sahəsində öz sözünü demiş və yüksək insani keyfiyyətlərə malik belə bir diplomatla, alimlə münasibətlərinin dostluğa çevrilməsindən məmnunluğunu ifadə edib.
Sonra nazirliyin Mərkəzi Avropa və Şərq departamentinin direktoru Antal Heizer çıxış edərək V.Quliyevin Azərbaycanla Macarıstan arasında əlaqələrin inkişaf etdirilməsindəki rolundan geniş bəhs edib və səfirin Macarıstan prezidenti tərəfindən belə yüksək ordenlə təltif edilməsinin bu xidmətlərin nəticəsi olduğunu diqqətə çatdırıb.
Departament direktorunun çıxışının ardınca Macarıstanın “Xidmətlərinə görə” ordeni səfir V. Quliyevə təqdim olunub.
Daha sonra V.Quliyev çıxış edərək ona göstərilən yüksək etimada görə Macarıstan prezidentinə, hökumətinə, o cümlədən, Xarici İşlər və Ticarət Nazirliyinə minnətdarlığını ifadə edib.
İki ölkə arasında əlaqələrin mövcud durumu ilə bağlı fikirlərini bölüşən səfir son dövrlər münasibətlərin yüksələn xətlə inkişaf etdiyini bildirib. Azərbaycan prezidenti İlham Əliyevin 2014-cü ilin noyabr ayında Macarıstana, bu ölkənin baş naziri Viktor Orbanın 2016-cı ilin mart ayında Azərbaycana səfərlərinin ikitərəfli əlaqələrin daha da dərinləşməsinə xüsusi təkan verdiyini qeyd edib.
Hazırda iki dövlət arasında yüksək etimada və siyasi dialoqa əsaslanan strateji tərəfdaşlıq münasibətlərinin mövcud olduğunu vurğulayan V.Quliyev əlaqələrin inkişaf etdirilməsində səfirliyin rolundan danışıb və bu istiqamətdə səylərin gələcəkdə daha da artırılacağını vurğulayıb.
C.ABASOV