2022-ci ilin sentyabr şəhidlərinə
Ana Torpaq, Anam Torpaq,
Bir ömürlük yol gəlmişik
Tarix olan yaddaşına.
Zamanında
qətiyyətin, cəsarətin,
Azıxdan,
Gəmiqayadan,
Qobustandan
düşən nura sədaqətin
qılınc kimi sıyrılıbdı
boy göstərən yad daşına!
2020-nin payızında
Azərbaycan əsgərinin
Qüdrətinin qarşısında
dizin-dizin sürünənlər
ermənilik kəfəninə büründülər,
2022-nin sentyabrında
Kəlbəcərin, Laçının
dağ-daşında göründülər...
Azərbaycan əsgərinin
Qətiyyəti dikəltmişdi
dağı-daşı.
Soltanbəyin ruhu idi.
hər əsgərin səngərdaşı...
...ya daşa,
Ya qaynaya, ya daşa.
Can verərəm. Qoymaram,
Bu dağları yad aşa!, -
deyirdi döyüşçülər.
...daşa çallan,
Ağ daşı daşa çallam.
Quduzlaşan düşmənin
Bəxtini daşa çallam!, -
Deyirdi döyüşçülər...
Azərbaycan əsgəriylə yan-yanaşı
Bamsı Beyrəklərin,
Qaraca Çobanların, ...
qətiyyəti döyüşürdü,
Pənahəli xanın, Cavad xanın, ...
dövlətçilik sədaqəti döyüşürdü,
Xan qızının
məmləkətə məhəbbəti döyüşürdü ...
Əsgərləşən bir millətin
Tarixlərə tarixin
yazan adı döyüşürdü,
Min illərə günyə olan
döyüş andı döyüşürdü.
Nizaminin "Sirlər xəzinəsi",
Füzulinin "Şəbi-hicran"ı,
Xətainin "Dəhnamə"si,
Xanın səsi,
Seyidin zənguləsi,
Yaqubun "Mənsurə"si,
"Qarabağın şikəstəsi" döyüşürdü...
Azərbaycan əsgəriylə
hər el, oba döyüşürdü.
Murov, Dəbdağ,
Sarı baba döyüşürdü...
O Zəfəri tamamlayan
Zəfər üçün döyüşürdülər.
Son illərin
gözlərinə nur olası
səhər üçün döyüşdülər...
Döyüşdülər...
Vətən üçün
Ermənilik xislətini
əzə-əzə döyüşdülər,
Bir niyyətin boğazını
üzə-üzə döyüşdülər...
Kəlbəcərə daş atanın
Əllərini
kəsmək üçün döyüşdülər,
"Laçın!" - deyən
dillərini kəsmək üçün döyüşdülər...
Bir bayrağın işığında
Şəhid oldu döyüşçülər...
Bir döyüşdən ölməzliyə
Gedən yoldu döyüşçülər...
Yeri göyə dikəldəsi,
Göyü yerə ələyəsi
bir növrağın döyüşüydü,
Göy üzündən enməyəcək
bir bayrağın döyüşüydü!
Qara bağı qırnaq üçün
Qarabağın döyüşüydü!
Ömür nədi, ölüm nədi
Vətən deyə!
Ana Torpaq, Anam torpaq!
Şəhidləri
Uğurladıq ölməzliyə!
...daşdı dizə,
Min illər adaşdı bizə.
Son qəmin olsun, ay Vətən!
Hər şəhid qardaşdı bizə!..
15 sentyabr 2022