Kiyev üçün kritik xəbərdarlıq: bütün şəhər boşaldıla bilər

Kiyev meri Vitali Kliçko bildirib ki, elektrik enerjisinin tam kəsilməsi halında sakinlər şəhəri tərk etməyə hazır olmalıdırlar. 

525.az xəbər verir ki, milyonlarla ukraynalı son həftələrdə fasilələrlə işıqsız və susuz qalıb, Rusiya isə ölkənin mühüm infrastruktur obyektlərini hədəfə alıb. 

Qiymətləndirmələrə görə, ölkənin enerji infrastrukturunu təşkil edən obyektlərin 40 faizi hücumlar nəticəsində ya zədələnib, ya da məhv olub. Elektrik enerjisinin paylanmasına təzyiqi azaltmaq və təmirə icazə vermək üçün planlaşdırılmış fasilələr həyata keçirilir. 

Ukrayna televiziyasına danışan Kiyev meri Vitali Kliçko ən pis ssenariyə hazırlaşdıqlarını bildirib. Rusiyanı “soyqırım və terrorizmdə” ittiham edən Kliçko xəbərdarlıq edib ki, şəhər qaranlığa qərq olarsa, su və kanalizasiya sistemləri də dayanacaq. 

Vitali Kliçko Rusiya lideri Putini ittiham edib: “O, bizi öldürmək istəyir. O, bizim torpaqlarımızı ələ keçirmək üçün donub qaçmağımızı istəyir." 

Kliçko həmçinin bildirib ki, şəhər rəhbərliyi işıqların yanması və suyun axması üçün “hər şeyi” edir. 

51 yaşlı mer həmçinin qeyd edib ki, ən pis ssenarinin baş verməsi ehtimalı olan halda, üç milyon sakin öz qohumlarının yanına getməyə hazır olmalıdır. Kiyevdə orta qış temperaturu sıfır dərəcədən aşağı qeydə alınır. Cenevrə Konvensiyasına görə, hücum edən dövlətlər mülki əhalinin zərər çəkə biləcəyi hədəfləri vurmaqdan çəkinməlidir.

Malik Atilay