“Twitter”də Maykl Ceksonun yeni klipi təqdim olundu
Mərhum pop musiqisi kralı Maykl Ceksonun yeni klipi videomusiqi tarixində yeni səhifə açacaq.
525.az-ın AzərTAca istinadən verdiyi məlumata görə, “A Place With No Name” mahnısının videolenti əfsanəvi müğənninin pərəstişkarlarına avqustun 13-də “Twitter” mikrobloqları vasitəsilə təqdim olunub. Eyni zamanda videoçarx Nyu-Yorkun “Tayms” bağındakı böyük ekranda translyasiya edilib.
Bu çarx premyerası “Twitter”də baş tutan ilk musiqi klipidir. Videoçarxın rejissoru “Rolling Stones” və “Nirvana” kimi işləri ilə tanınmış klipmeyker Semuel Beyerdir. “A Place With No Name” Ceksonun vəfatından sonra onun cari ilin mayında buraxılmış yeni “Xscape” albomundan sonra ikinci sinqli olacaqdır.
“A Place With No Name” kompozisiyası America qrupunun məşhur “A Horse With No Name” xitinin remeykidir. Cekson bu treki 1998-ci ildə reper Dr Frize ilə birlikdə yazmışdı.
