Ayxan Abbasov Adil Nağıyev və Georgi Kantariyanın göndərilməsindən danışdı
"Şamaxı”nın baş məşqçisi Ayxan Abbasov iki futbolçu ilə yolları ayırmaları haqda danışıb.
QOL.az xəbər verir ki, "Şamaxı" kapitan Adil Nağıyev və gürcüstanlı futbolçu Georgi Kantariya ilə müqaviləni pozub.
A.Abbasov Misli Premyer Liqasının 16-cı turunda bu gün "Turan Tovuz"la keçirilən oyundan sonra "CBC Sport"a açıqlamasında futbolçuların komandadan göndərilməsi ilə bağlı deyib: “Bununla bağlı rəsmi açıqlama veriləcək. İki futbolçu ilə də vidalaşdıq. Oyundan öncə söz-söhbət gəzirdi ki, “Şamaxı”da maddi problemlər var. Fürsətdən istifadə edib demək istəyirəm ki, heç bir problem yoxdur. Klub öz üzərinə düşən bütün öhdəliklərini yerinə yetirir. Bəzi problemlər var, inşallah klub olaraq düz qərar verəcəyik. Bəzi futbolçularla problemlərimiz var idi, ona da klub olaraq, düzgün qərar verdik. Gələcəkdə bu haqda rəsmi məlumat veriləcək”.
