ÇL-də "pley-off"u təmin edən ilk komanda
UEFA Çempionlar Liqasında növbəti mərhələyə vəsiqəni təmin edən ilk komanda müəyyənləşib.
QOL.az xəbər verir ki, bu, İngiltərənin "Liverpul" klubudur. Arne Slotun rəhbərlik etdiyi kollektiv dünən səfərdə "Jirona"nı (İspaniya) 1:0 hesabı ilə məğlubiyyətə uğradıb.
Bununla da ingilislər keçirdiyi 6-cı oyunu da qələbə ilə başa vuraraq xalını 18-ə yüksəldib. Onlar ən pis halda pley-off mərhələsində oynamaq hüququ qazanıb. Lakin komandanın 1/8 finala birbaşa yüksəlmək şansı daha çoxur.
Qeyd edək ki, hazırda "Liverpul" 36 komanda arasında vahid liderdir. Onlar bütün matçlarında qələbə qazanıblar.
ÇL-i tərk edəcək ilk komanda isə keçirdiyi bütün 6 matçında hamısında uduzan "Leyptsiq" (Almaniya) olub.
Xatırladaq ki, avrokuboklarda yeni formatda keçirilən Liqa mərhələsi bu mövsümdən başlayıb. ÇL-də 1-8-ci yeri tutanlar 1/8 finala yüksələcək, 9-24-cü yeri tutanlar isə 1/8 finala çıxmaq üçün 2 matçdan ibarət pley-off matçlarında oynayacaqlar. 24-36-cı yeri tutanlar avrokuboklarda mübarizəni başa vuracaqlar.
