Rui Borgesin təyinatı açıqlandı
"Sportinq"in yeni baş məşqçisi rəsmən açıqlanıb.
QOL.az klubun rəsmi saytına xəbər verir ki, Portuqaliya təmsilçisini Rui Borges çalışdıracaq.
Bu gün 43 yaşlı mütəxəssislə 2026-cı ilin iyununa qədər müqavilə imzalanıb.
"A Bola"nın məlumatına görə, bu keçid üçün "Sportinq" "Vitoriya"ya 4 milyon avro ödəməli olacaq. Çünki Borgesin Gimanaynş təmsilçisi ilə 2026-cı ilin iyununa qədər müqaviləsi var idi.
Xatırladaq ki, bu ilin noyabr ayında Ruben Amorim "Sportinq"i tərk edərək "Mançester Yunayted"in baş məşqçisi təyin edilib. Onun gedişindən sonra komandanı Joao Pereyra çalışdırıb. Pereyranın fəaliyyəti fiasko ilə nəticələndiyindən o, qısa müddətdən sonra qovulub. Amorim komandanı tərk edəndə "Sportinq" şəriksiz lider idisə, indi 2-ci pillədə qərarlaşıb.
