Elmar Baxşıyev: "Çempionat və kubok oyunlarını ayırmırıq"

"Araz-Naxçıvan"ın baş məşqçisi Elmar Baxşıyev Misli Premyer Liqasının 30-cu turunda "Kəpəz"lə 0:0 hesablı heç-heçə etdikləri oyunu şərh edib. 

QOL.az xəbər verir ki, o, matçdan sonra keçirilən mətbuat konfransında deyib: "Ağır oyun alındı. Bizi nəyin gözlədiyini bilirdik. Sıx oyunlar qrafikindəyik. Birinci yox, ikinci hissədə oyunun tempini yüksəldə və epizodlar yarada bildik. Gedişat elə alındı ki, uda da, uduza da bilərdik. Bu görüşü unudub, gələn matça hazırlaşacagıq".
 
Mütəxəssis heyətdəki itkilərdən də söz açıb: "Heyətimizdə çoxsaylı zədəli futbolcular var. Paro, Bəxtiyar olmayanda biz də məcburiyyətdən müəyyən rotasiyalar edirik. Komanda şəklində ikinci hissədə oyunun axarını ələ almağı bacardıq". 

E. Baxşıyev sıx oyun təqvimindən danışıb: "Futbol stressli idman oyunudur. Ona görə gərginliyin olacağı normal idi. Sıx qrafiklə oynamaq istəmirsənsə, gərək, iddialı olmayasan. Ona görə çempionat və kubok oyunlarını bir-birindən ayırmırıq".