“Hakimlərə demişəm ki, rəqib qapısına penalti təyin etməyin”

Azərbaycan Premyer Liqasının 6-cı turunda keçirilən “Qarabağ” – “Neftçi” matçı bir sıra mübahisəli hakim qərarları ilə yadda qaldı.

Qol.Az-ın məlumatına görə, matçın baş hakimi Fariz Yusifovun “Neftçi”nin qapısına təyin etdiyi penalti zərbəsi isə paytaxt klubunun kəskin etirazına səbəb olub.

Qarşılaşmadan sonra “Qarabağ”ın baş məşqçisi Qurban Qurbanov penalti epizodu ilə bağlı fikirlərini bildirib. O, ümumiyyətlə, futbolda penaltinin əleyhinə olduğunu deyib:

“Hakimin verdiyi qərar haqda danışmaq istəməzdim. Dəfələrlə hakimlərə bildirmişəm ki, bizim oyunda rəqib qapısına penalti təyin etməyin. Çünki çox söz-söhbətlər yaranır.

Ümumiyyətlə, penaltini ləğv etməyin tərəfdarıyam.  Ancaq bir məsələ də var ki, biz daima hücumda olan komandayıq. İstər-istəməz rəqibi təzyiq altında saxlayırıq. Buna görə də bizim oyunlarda penaltilərin çox olması normaldır. Hakimin səhv qərarı nəticəyə təsir edirsə, bunun əleyhinəyəm”.