“Qalatasaray” - “Fənərbaxça” derbisinin vaxtı dəyişdirildi
Türkiyə Super Kubokunda “Qalatasaray” - “Fənərbaxça” derbisinin başlama saatı dəyişdirilib.
525.az xəbər verir ki, bu barədə Türkiyə Futbol Federasiyası rəsmi məlumat yayıb. Belə ki, final qarşılaşmasının vaxtına yenidən baxılıb.
Atatürk Olimpiya Stadionunda saat 20:30-da keçirilməsi planlaşdırılan oyun əlverişsiz hava şəraiti və gözlənilən fırtına ilə əlaqədar olaraq 18:45-ə təyin edilib. Qərar meteoroloji proqnozlar, İstanbul Valiliyinin xəbərdarlıqları və klubların nümayəndələri ilə aparılan müzakirələrdən sonra qəbul olunub.
Sinoptiklərin məlumatına görə, oyun günü İstanbulda güclü külək və yağış gözlənilir. Matç zamanı havanın temperaturunun 12 dərəcə, rütubətin isə 92 faiz olacağı bildirilir.
Qeyd edək ki, “Qalatasaray” - “Fənərbaxça” derbisi sabah, yanvarın 10-da baş tutacaq.
