Mircavadov: "Qarabağ" "Valletta"dan hərtərəfli güclüdür"
"Bugünkü rəqib "Qarabağ" üçün münasibdir. Düzdür, "Valletta" arıdıcıl bir neçə ildir ki, avrokuboklarda mübarizə aparır. Ancaq bir çox amilləri nəzərə alanda "Qarabağ"a üstünlük verirəm".
Qol.Az saytına açıqlamasında bu sözləri Azərbaycanın əməkdar məşqçisi Ağasəlim Mircavadov "Qarabağ"ın Çempionlar Liqasının II təsnifat mərhələsində bu gün Maltanın "Valletta" klubu ilə qarşılaşacağı oyun haqda danışarkən deyib.
Təcrübəli mütəxəssis sabiq komandasının mərhələni keçəcəyinə inandığını bildirib: "Qarabağ" sakit şəkildə, öz ənənəsinə uyğun oynamalıdır. Komandamız özündə top saxlamağı bacarır. Səfərdə də bu taktika ilə oynamaq lazımdır. "Qarabağ" mütləq bu mərhələni keçməlidir. Mən buna inanıram. Ola bilər ki, bu gün "Qarabağ"ın oyunu alınmasın və qalib gələ bilməsin. Ancaq mərhələni keçəcəklərinə inanıram. Çünki "Qarabağ"ın səviyyəli futbolçuları və düzgün oyun taktikası var. "Valletta"nı da zəif saymıram. Avropada zəif komanda yoxdur. Amma "Qarabağ" "Valletta"dan hərtərəfli güclüdür".
