Makrona Olimpiya zərbəsi, hava limanı işçiləri tətilə hazırlaşır

Parisdə Olimpiya Oyunların açılışı ərəfəsində hava limanının işçiləri tətil elan edəcəkləri ilə hədələyirlər. Onlar “Olimpiya bonusu” deyilən pulun ödənilməməsindən narazıdırlar.

525.az xarici KİV-ə istinadən xəbər verir ki, hava limanı işçilərinin maraqlarını təmsil edən həmkarlar ittifaqları iyulun 17-də tətilə çağırıblar. Aksiya baş tutsa, bu, Oyunların açılışına hazırlığın pozulmasına səbəb ola bilər.

Həmkarlar ittifaqları öz bəyanatlarında Olimpiya mükafatı deyilən bonusu rəhbərliyin yalnız müəyyən işçilərə verilməsi ilə bağlı birtərəfli qərarını pisləyiblər.

Ruassi-Şarl de Qoll və Orli hava limanları iyulun 26-da açılacaq Olimpiada üçün Fransaya gələn turistlər üçün əsas qapı olacaq. “Le Monde” qəzetinin hesablamalarına görə, Olimpiada zamanı Paris hava limanlarından 350 minə qədər insan keçəcək. Bu, təkcə azarkeşlər deyil, minlərlə idmançı iyulun 18-dən Olimpiya kəndində toplaşmağa başlayacaq.

Oyunlar öncəsi tələblər irəli sürən təkcə hava limanının əməkdaşları deyil. Fransanın bütün dövlət sektorunda işçilərin maraqlarını təmsil edən həmkarlar ittifaqları Olimpiada zamanı işləməli olduqları üçün maaşların artırılmasını tələb ediblər. Polis, aviadispetçerlər, zibil yığanlar, qatar maşinistləri və bir çox başqaları maaşların artırılması və mükafatların verilməsi tələbini irəli sürürlər.

Hava limanında tətil elanı solçu “Yeni Xalq Cəbhəsi”nin növbədənkənar seçkilərdə ən çox səs toplamasından bir neçə gün sonraya təsadüf edib. Əvvəllər YXC dəfələrlə söz verib ki, əgər qalib gəlsə, minimum əmək haqqının və dövlət sektoru işçilərinin maaşlarının artırılmasına çalışacaq.

Qarşıdan gələn tətilin miqyası hələ aydın deyil. İstənilən halda, tətilin haba limanlarında xaosa səbəb olacağı istisna deyil.

Pərvanə Sultanova