"Qəbələ" – "Apollon" oyunu ilə bağlı maraqlı məqam

Avropa Liqasının III təsnifat mərhələsinin ilk oyunu çərçivəsində Kiprdə keçirilən "Apollon" - "Qəbələ" matçında (1:1) yaşanan olaylar aktuallığını qoruyur.

Qol.Az-ın məlumatına görə, həmin matçın son dəqiqələrində baş hakim Sergey Boykonun meydan sahiblərinin qapısına penalti təyin etməsindən sonra ara qarışmışdı.

Referinin qərarı ilə razılaşmaq istəməyən "Apollon"lu futbolçuların etirazları nəticəsiz qalır. Təyin olunan penaltini dəqiq yerinə yetirən "Qəbələ"nin kapitanı Cavid Hüseynovun qoldan sonra bayrağımızın təhqir olunmasına ədəbsiz jest etməklə cavab verməsi gərginliyi daha da artırmışdı.

Kiprlilər baş verənlər qalmaqalda matçın ukraynalı baş hakimi Sergey Boykonu günahlandırıblar. Onlar S.Boykonun "Qəbələ"dəki həmyerlisi Roman Qriqorçukun komandasının lehinə qərarlar verdiyini iddia edirlər.

Maraqlıdır ki, "Qəbələ"nin cavab görüşünə isə "Apollon"un baş məşqçisi Pedro Emanuelin həmyerliləri təyin edilib. Avqustun 6-da keçiriləcək "Qəbələ" - "Apollon" görüşünü Portuqaliyadan olan hakimlər briqadası idarə edəcək. Matçın baş hakimi Duarte Qomeş olacaq. Ona həmyerliləri Luiş Kampoş və Venansio Tome köməklik edəcək. Bakıdakı görüşdə Duarte Qomeşin həmyerlisi Pedro Emanuelin komandasının ("Apollon") lehinə qərarlar qəbul edib-etməyəcəyi maraq doğurur.

Qeyd edək ki, UEFA-nın bu təyinatını təsadüf adlandırmaq olar. Çünki "Qəbələ"nin cavab görüşünün hakimləri Kiprdə baş tutan ilk oyundan öncə müəyyənləşmişdi.