Azərbaycanda son illər mədəniyyətlə, xalqımızın mədəni-mənəvi irsi ilə bağlı bir sıra uğurlu layihələr həyata keçirilməkdədir. Onlardan bəziləri ardıcıl, davamlı şəkildə gerçəkləşdirilməklə xoş bir ənənə halını alır, ölkənin mədəni gündəmində öz layiqli mövqeyini uzun müddət qoruyub saxlayır. Bu isə öz növbəsində Azərbaycan mədəniyyətinin təbliğinə, onun qorunub gələcəyə ötürülməsi işinə təkan verir. Belə layihələr sırasında bugünlərdə 4 yaşı tamam olan “Xalq Əmanəti” layihəsinin xüsusi yeri var.

2010-cu ilin mart ayında “Xalq Bank” ASC, Azərbaycan xalqının mədəni irsinin qorunaraq gələcək nəsillərə çatdırılması yönündə xidmət naminə, “Xalq Əmanəti” sosial-mədəni layihəsinin həyata keçirilməsinə qərar verib. Dörd ildən bəri uğurla həyata keçirilən “Xalq Əmanəti” milli mədəniyyətimizi, onun tarixini, ədəbiyyatını, incəsənətini və elmini, eyni zamanda, bütün bu sahələrdə misilsiz nailiyyətlərə imza atmış görkəmli xadimlərin ömür və fəaliyyət yolunu yüksək səviyyədə əks etdirən dəyərli bir layihəyə çevrilib.

Layihə çərçivəsində Azərbaycanın böyük rəssam və şairlərinin həyat və yaradıcılığını əks etdirən bədii albomlar, poetik toplular işıq üzü görüb, “Azərbaycan sikkələri” elmi-tarixi tədqiqat işi nəşr edilib. Bankın Bakı və Gəncə şəhərlərində yerləşən binalarında görkəmli rəssamlarımızın sərgiləri təşkil olunub. Layihə üzrə nəfis şəkildə hazırlanıb ərsəyə gətirilən bütün nəşrlər hədiyyəlik olması və üç dildə – Azərbaycan, ingilis, rus dillərində çap edilməsi ilə də əlamətdardır. Həmin nəşrlər ölkənin ali və orta təhsil müəssisələrinə, uşaq evləri və kitabxanalara, müxtəlif fondlara, dövlət idarələrinə, müxtəlif dövlətlərin ölkəmizdəki və Azərbaycanın ayrı-ayrı ölkələrdəki səfirlik və konsulluqlarına, eləcə də çox sayda sənətsevərə hədiyyə olunur. Bu illər ərzində Xalq rəssamları Böyükağa Mirzəzadə, Maral Rəhmanzadə, Səttar Bəhlulzadə, Xalidə Səfərova və Mahmud Tağıyev, Fazil Əliyev, Rza Məmmədov, Gennadi Brijatyuk və Qorxmaz Sücəddinovun əsərlərindən ibarət sərgilər keçirilib, onların əsərlərindən ibarət bədii albomlar nəşr edilib. Xalq şairləri Məmməd Araz və Hüseyn Arifin, eləcə də unudulmaz şairimiz Mikayıl Müşviqin seçilmiş əsərləri, həmçinin görkəmli alim-numizmat, professor Əli Rəcəblinin “Azərbaycan sikkələri” kitabı da məhz “Xalq Əmanəti” kimi hazırlanaraq işıq üzü görüb. Vurğulanmalı bir mühüm cəhət də budur ki, “Xalq Əmanəti” üzrə nəşrlərin təqdimat mərasimləri, təşkil edilən sərgilər Azərbaycanın adlı-sanlı sənət adamlarının, tanınmış ziyalılarının bir araya gəldikləri, xoş əhval-ruhiyyə ilə səmimi fikir mübadiləsi apardıqları doğma, munis mühitə çevrilir.

“Xalq Əmanəti”nin bir neçə gün əvvəl, fevralın 28-də keçirilən onuncu – yubiley buraxılışı Azərbaycanın böyük fırça ustası, Xalq rəssamı, Beynəlxalq Cəvahirləl Nehru Mükafatı laureatı Mikayıl Abdullayevin həyat və yaradıcılığına həsr olunub. Təsviri sənətimizin inkişafında mühüm xidmətləri olan bu görkəmli sənətkarın rəngkarlıq və qrafika janrında yaratdığı möhtəşəm əsərlər milli incəsənətimizin və dünya rəssamlığının çox qiymətli nümunələridir. Dünyanın bir çox ölkələrinin muzeylərində dəyərli eksponatlar kimi saxlanılan Mikayıl Abdullayev yaradıcılığının əsrarəngiz örnəkləri həmin ölkələrdə milli mədəniyyətimizin daimi təbliğatçılarıdır. Bu əsərlərdə vətənimizin əsrarəngiz təbiəti, şanlı tarixi, milli-mənəvi dəyərləri, Azərbaycan insanının zahiri və mənəvi məziyyətləri böyük məharətlə təsvir olunub.

Müxtəlif janrlarda çeşidli sənət inciləri yaratmış Mikayıl Abdullayevin yaradıcılığında Bakı metrosunun “Nizami” stansiyasının interyerinin tərtibatı xüsusi yer tutur. Onun yaradıcı zəkasının məhsulu kimi stansiyanın divarlarında əks olunan təsvirlər mozaika sənətinin ən gözəl nümunələri kimi zövq oxşayır. Metronun bu stansiyası yeraltı qalereya təəssüratı yaradır və onun seyrinə dalan hər bir sənətsevəri valeh edir.

Ölməz sənətkarımızın milli teatr rəssamlığının inkişafında da önəmli xidmətləri olub. O, “Leyli və Məcnun”, “Koroğlu” operalarına, Niyazinin “Çitra” baletinə gözəl bədii tərtibat verib. Təsadüfi deyil ki, görkəmli bəstəkarımız Fikrət Əmirov M.Abdullayevi “bəstəkar ürəkli rəssam” adlandırıb. Onun yaratdığı məktəbin yetirmələri olan onlarla sənətkar bu gün milli rəssamlıq sənətimizin inkişafına uğurla, fədakarlıqla xidmət etməkdədir.

Layihə çərçivəsində keçirilən digər mərasimlərdə olduğu kimi, “Xalq Əmanəti”nin Mikayıl Abdullayevə həsr olunan buraxılışının təqdimatına da Azərbaycanın məşhur mədəniyyət və incəsənət adamları, alimlər, media nümayəndələri toplaşıblar.

Tədbir iştirakçılarından Azərbaycan Rəssamlıq Akademiyasının rektoru, Xalq rəssamı Ömər Eldarov mərhum həmkarını ehtiramla yad edərək, onun yaradıcılığından rəğbətlə söz açıb. Ö.Eldarov bildirib ki, M.Abdullayev doğma Azərbaycanın və gəzib-gördüyü neçə-neçə ölkənin təbiət mənzərələrini, insanlarını böyük məhəbbətlə təsvir etməklə qeyri-adi əsərlər yaradıb.

Bakı Musiqi Akademiyasının rektoru, xalq artisti Fərhad Bədəlbəyli M.Abdullayevin həm şəxsiyyəti, həm də yaradıcılığı barədə yüksək fikirlər söyləyib, onun əsərlərindən ibarət kitabın “Xalq Əmanəti” çərçivəsində nəşr edilməsini alqışalayiq addım kimi dəyərləndirib.

Xalq rəssamı Arif Hüseynov Mikayıl Abdullayevi Azərbaycan rəssamlıq tarixində özünəməxsus yol açmış ustad sənətkar adlandırıb: ”Mən xoşbəxtəm ki, onun tələbəsi olmuşam. Ondan çox şey öyrənmişəm və bütün bunlara görə Mikayıl müəllimin ruhuna minnətdaram”.

Xalq rəssamları Ağaəli İbrahimov, Səlhab Məmmədov, AMEA-nın müxbir üzvü Teymur Kərimli, Azərbaycan Milli Konservatoriyasının rektoru Səyavuş Kərimi, şair Çingiz Əlioğlu və digər mərasim iştirakçıları da Mikayıl Abdullayevin özü və sənəti haqqında böyük məmnunluqla söz açıblar.

Çıxışlarda “Xalq Əmanəti”nin milli mədəniyyətimizin təbliğinə xidmət edən önəmli layihə olduğu vurğulanıb.

Mikayıl Abdullayevin əsərlərindən ibarət ekspozisiya “Xalq Bank”ın Bakı şəhəri, İnşaatçılar prospekti 22L ünvanında yerləşən Baş Ofisində martın 1-dən iyunun 10-dək nümayiş olunacaq. Gəncə şəhəri Zərrabi küçəsi 4 ünvanındakı “Gəncə” filialında isə martın 10-dan iyunun 10-dək sərgilənəcək. Sərgiləri iş günləri saat 18.00-dan 21.00-dək, şənbə və bazar günləri isə saat 10.00-dan 16.00-dək ziyarət etmək mümkündür və giriş sərbəstdir.

S.ABDULLAYEVA