Topaz Premyer Liqasının XXIX turunun “Qəbələ” – “Simurq” oyununda ölkə çempionatları tarixində yubiley qolu vurulub.
Apasport.az saytının məlumatına görə, meydan sahiblərinin futbolçusu Ruslan Abışovun vurduğu qol ölkə futbol çempionatları üçün 11000-ci olub.
Belə ki, 1:0 hesabı ilə başa çatan qarşılaşmayadək 1992-ci ildə start götürən milli çempionatlarda 10999 qol vurulmuşdu. Cari mövsümün startına qədər bu rəqəm 10720, XXIX turdan əvvəl isə 10992-yə bərabər idi. Mövsümün 280-ci, turun 8-ci –sonuncu qolu yubiley xarakteri daşıyıb.
Qeyd edək ki, ölkə çempionatlarında 10000-ci qol 865 gün əvvəl - 2012-ci il noyabrın 25-də vurulmuşdu. Topaz Premyer Liqasının 2012/13 mövsümünün XIV turunun “Bakı” – “Neftçi” oyununda Elvin Məmmədovun qonaqların qapısına vurduğu top ölkə futbol çempionatlarında 10000-ci qol olmuşdu.