Bu, Çin və Mərkəzi Asiya ölkələrinin münasibətləri tarixində yeni mərhələ oldu - XİN

İkinci Çin-Mərkəzi Asiya sammiti zamanı imzalanmış “Əbədi qonşuluq, dostluq və əməkdaşlıq haqqında” saziş Çin ilə beş Mərkəzi Asiya dövləti arasında münasibətlər tarixində yeni mərhələ olmaqla yanaşı, Pekinin qonşu ölkələrlə diplomatiyasında öncül təşəbbüsdür.

525.az xəbər verir ki, bu barədə Çin Xarici İşlər Nazirliyinin (XİN) rəsmi nümayəndəsi Qo Jiakun bildirib.

Çinin Sədri Si Cinpin Qazaxıstanın paytaxtı Astanada keçirilən 2-ci Çin-Mərkəzi Asiya sammitində iştirak edib və proqram xarakterli nitq söyləyib. O, çıxışında Çin və Mərkəzi Asiya arasında səmərəli əməkdaşlığı hərtərəfli ümumiləşdirərək “Çin-Mərkəzi Asiya ruhu” konsepsiyasını irəli sürüb.

“Cənab Si Cinpin bildirib ki, tərəflər qarşılıqlı etimad və dəstəyə əsaslanan birlik arzusunu qətiyyətlə dəstəkləməli, praqmatik, yüksək effektiv və dərin inteqrasiya olunmuş əməkdaşlıq çərçivəsini optimallaşdırmalı, sülh, əmin-amanlıq və ümumi maraqlara əsaslanan təhlükəsizlik arxitekturasını formalaşdırmalıdır. Onun sözlərinə görə, ümumi düşüncə və əxlaqi prinsiplərə, xalqlar arasında qarşılıqlı anlaşmaya və yaxınlığa əsaslanan mədəni əlaqələri gücləndirmək, ədalətli, bərabər və nizamlı beynəlxalq düzəni qorumaq vacibdir", - XİN rəsmisi bildirib.

Əlavə edib ki, altı ölkə - Çin, Qazaxıstan, Qırğızıstan, Tacikistan, Türkmənistan və Özbəkistan qarşılıqlı hörmət, qarşılıqlı etimad, qarşılıqlı fayda və yardım prinsiplərinə əsaslanan "Çin-Mərkəzi Asiya ruhunu" tam şəkildə inkişaf etdirmək barədə razılığa gəliblər ki, bu da sammitin mühüm məqamına çevrilib.

Qo Jiakunun sözlərinə görə, sammit iştirakçıları gələcək əməkdaşlıq üçün prioritetləri müəyyən edib və üç əməkdaşlıq mərkəzinin - yoxsulluğun aradan qaldırılması, təhsil mübadiləsi, səhralaşmanın qarşısının alınması və nəzarət, habelə ticarətin asanlaşdırılması üzrə əməkdaşlıq platformasının yaradılması barədə qərar qəbul ediblər.

O bildirib ki, Çin və Mərkəzi Asiya yüksək keyfiyyətli regional inkişafı təşviq edəcək və modernləşməni birgə irəli aparacaq: “Pekin ortaq gələcəyi olan Çin-Mərkəzi Asiya icması qurmaqla Mərkəzi Asiya ölkələri ilə birlikdə nümunə göstərməyə hazırdır".

Pərvanə Sultanova